Dont drink & Drive

Dont drink & Drive

Wednesday, November 28, 2007

ചാലക്കുടി St James Hospital ലെ കണക്കുകള്‍

ചാലക്കുടി St James Hospital ലെ കണക്കുകള്‍ നമ്മുടെ കണ്ണു തുറക്കാന്‍ സഹായിക്കും എന്നു വിശ്വസിക്കുന്നു. ബഹുമാനപ്പെട്ട മന്ത്രിയുടെ കണ്ണ്‍ തുറക്കാന്‍ അതെന്തായാലും സഹായിച്ചു.

ഈ ആശുപത്രിയിലാണ്‌ ഒരു main Neurosurgical unit ഉള്ളത്‌. അതുകാരണം ധാരാളം head injury patients അവിടെ വരുന്നുണ്ട്‌.അവരുടെ കണക്കു പ്രകാരം october 2006 മുതലുള്ള കണക്കു നോക്കിയാല്‍ എതാണ്ട്‌ ഓരോ മാസവും 150 നും 200 നും ഇടയ്ക്ക്‌ തലയ്ക്ക്‌ ക്ഷതമേറ്റവര്‍ അവിടെ ചികില്‍സയ്ക്കായി എത്തിയിരുന്നു..

ഹെല്‍മെറ്റ്‌ compulsory ആക്കിയ ജൂണ്‍ ജൂലൈ മാസങ്ങളില്‍ ഇത്‌ 18 ഉം 14 ഉം ആയിക്കുറഞ്ഞു. എല്ലാരും വായിട്ടലച്ച്‌ നിയമം അയഞ്ഞപ്പോള്‍ ഇതു വീണ്ടും പഴയപടി 150 നും 200നും ഇടയ്ക്കായി.

hospitalന്‌ ഇതു വന്‍ നഷ്ടമായിരുന്നു എന്നു പ്രത്യേകം പറയേണ്ടതില്ലല്ലോ. എന്നിട്ടും അവര്‍ ഇത്‌ പ്രസിദ്ധീകരിച്ച്‌ ഹെല്‍മെറ്റ്‌ compulsory ആക്കാന്‍ യത്നിച്ചു എന്നുള്ളത്‌ സ്തുത്യര്‍ഹമാണ്‌.

ഇത്തവണയെങ്കിലും നമുക്ക്‌ പിടിച്ചു നില്‍ക്കാന്‍ കഴിയും എന്നു നമുക്ക്‌ ആശിക്കാം. കുറച്ചു scan centreഉകളും അപകടമരണ കേസുകളില്‍ നിന്നു പൈസ ഉണ്ടാക്കുന്ന ഒരു ലോബിയുമല്ലാതെ വേറെയാര്‍ക്കും ഇതില്‍ എതിര്‍പ്പുണ്ടാകുമെന്നു തോന്നുന്നില്ല.

Rotary Club ന്റെ പ്രവര്‍ത്തനം മൂലം എറണാകുളത്ത്‌ 90% പേരും ഇപ്പോള്‍ ഹെല്‍മെറ്റ്‌ ധരിക്കുന്നുണ്ട്‌ എന്ന് അവര്‍ അവകാശപ്പെടുന്നു. ഇതു ശരിയായ വിവരം ആണോ എന്ന് എറണാകുളത്തുള്ള ആര്‍ക്കെങ്കിലും സ്ഥിരീകരിക്കാമോ? ഇതു ശരിയാണെങ്കില്‍ മറ്റു ജില്ലകളില്‍ എന്താണിത്ര resistance എന്നു നമുക്കു ചിന്തിക്കേണ്ടിയിരിക്കുന്നു.

Friday, November 2, 2007

തലയിലെ ചട്ടി - repost



ഹെല്‍മെറ്റ്‌ എന്തിന്‌ ?




വര്‍ഷങ്ങളായിട്ട്‌ നാം ഇടക്കിടക്ക്‌ കേള്‍ക്കുന്ന ഒരു "പ്രശ്നം".




നമ്മുടെ തല രക്ഷിക്കാനായി നമ്മളെക്കാള്‍ ആഗ്രഹം ഉള്ള ചിലര്‍ ചേര്‍ന്ന് ഇത്‌ തുടങ്ങിവിടുന്നു. പിന്നെ അങ്ങോട്ടുമിങ്ങോട്ടും ചീത്ത വിളിയായി, കയ്യേറ്റമായി, ലാത്തി ഏറായി, എന്നു വേണ്ട കേരളീയര്‍ ഒന്നാകെ ഇതിന്റെ പുറകേ ആണോ എന്ന് നമുക്ക്‌ തോന്നിപ്പ്പ്പോകും. ആരെങ്കിലും കൊണ്ട്‌ ഒരു കേസ്‌, ഒരു സ്റ്റേ, അതോടെ പ്രശ്നം തീരുന്നു - കുറച്ചു കാലത്തേക്ക്‌.




എന്തിനാണ്‌ ശരിക്കും ഈ ചട്ടി കമഴ്ത്തല്‍? നമുക്ക്‌ നല്ല കട്ടിയുള്ള skull തലയോട്ടി ഇല്ലേ? ഇത്രക്ക്‌ പ്രധാനമായി എന്താണ്‌ അതിനകത്തുള്ളത്‌? ഒരു കയ്യില്‍ പിടിച്ചിരുന്നാല്‍ പോരേ, എന്തിനു തലയില്‍ തന്നെ വയ്ക്കണം? മുടി കൊഴിയുകയില്ലേ?




നമ്മുടെ തലയോട്ടിക്കുള്ളില്‍ ബ്രെയിന്‍ suspend ചെയ്തിരിക്കുകയാണ്‌ , അതായത്‌,ഒരിടവും തൊടാതെ അതിനെ cerebrospinal fluid എന്ന ലായനിയില്‍ നിമജ്ജനം ചെയ്തിരിക്കുന്നു. തലയോട്ടി പുറമേ നിന്നു കാണുന്നതുപോലെ മിനുസമുള്ള ഒരു പ്രതലമല്ല. അകത്ത്‌ പല രീതിയിലുള്ള മൂര്‍ച്ചയുള്ള തള്ളിച്ചകള്‍ (prominence) ഉണ്ട്‌.തലയോട്ടിയുടെ പുറം scalp എന്ന തൊലി കൊണ്ട്‌ കവര്‍ ചെയ്തിരിക്കുന്നു. ഇതില്‍ നിന്നാണ്‌ മുടി വളരുന്നത്‌. അങ്ങനെ scalpഉം മുടിയും കാരണം തലയോട്ടിയുടെ മിനുസമായ പ്രതലം നഷ്ടപ്പെടുന്നു. വാഹനത്തില്‍ നിന്നു തെറിച്ച്‌ വീഴുമ്പോള്‍ ഈ മിനുസമല്ലാത്ത പ്രതലം റോഡിന്റെ മിനുസമല്ലാത്ത പ്രതലത്തില്‍ ചെന്നിടിക്കുന്നു. രണ്ടും പരുപരുത്തതായതു കൊണ്ട്ഘര്‍ഷണം (friction) കാരണം വളരെപ്പെട്ടെന്നു തന്നെ തലയുടെ" യാത്ര" അഥവാ തറയില്‍കൂടിയുള്ള സഞ്ചാരം നില്‍ക്കൂന്നു. പക്ഷേ നേരത്തെ പറഞ്ഞതു പോലെ, നമ്മുടെ ബ്രെയിന്‍ ഒരിടത്തും ഉറപ്പിച്ചിട്ടില്ലാത്തതിനാല്‍ അതേ സ്പീഡില്‍ തന്നെ (40 km എന്നു വയ്ക്കുക)യാത്ര തുടരുന്നു. തലയോട്ടിയുടെ ഉള്ളിലുള്ള മൂര്‍ച്ചയുള്ള എല്ലിന്റെ തള്ളലുകള്‍ ഇപ്പോഴാണ്‌ മാരകമാകുന്നത്‌. ബ്രെയിന്‍ 40 കിലോമീറ്റര്‍ വേഗതയില്‍ ചെന്നു ഇതില്‍ ഇടിക്കുന്നത്‌ ആലോചിച്ചു നോക്കൂ.അതേസമയം ഹെല്‍മെറ്റ്‌ വെച്ചിട്ടുണ്ടെങ്കില്‍, തലയുടെ പ്രതലം മിനുസം ഉള്ളതായി മാറുന്നു. തറയില്‍ ഇടിച്ച ഉടനേ നില്‍ക്കുന്നില്ല എന്നുള്ളത്‌ കൊണ്ട്‌ തലയും അതിനുള്ളിലെ ബ്രെയിനും സഞ്ചരിച്ചു കൊണ്ടെയിരിക്കുന്നു (അതായത്‌ പെട്ടെന്ന് നില്‍ക്കുന്നില്ല)ഇപ്പ്പ്പൊഴും ,തലയോട്ടിയും ബ്രെയിനും ഒരുമിച്ചു നിന്നില്ലെങ്കില്‍, ഉള്ളിലുള്ള തള്ളി നില്‍ക്കുന്ന എല്ലില്‍ കൊള്ളാനുള്ള സാധ്യത ഉണ്ടെങ്കിലും,സ്പീഡ്‌ കുറയാനുള്ള സമയം കിട്ടുന്നതിനാല്‍, കേടുപാടുകള്‍ താരതമ്യേന കുറവായിരിക്കും.പിന്നെയുള്ള ഒരു കാര്യം - തല തറയില്‍ ഇടിക്കുമ്പോള്‍ ഹെല്‍മെറ്റ്‌ ഒരു shock absorber എന്ന മട്ടില്‍ പ്രവര്‍ത്തിക്കുന്നു. യഥാര്‍ത്തത്തില്‍ വെളിയില്‍ കാണുന്ന ലോഹ കവചം അല്ല ഇവിടെ പ്രധാനം.ഉള്ളിലുള്ള thermocol പോലെയുള്ള വസ്തു ആണ്‌ നമ്മുടെ തലയെ രക്ഷിക്കുന്നത്‌. ഇത്‌ ആഘാതത്തിന്റെ സമയത്ത്‌ ഊര്‍ജം മുഴുവന്‍ absorb ചെയ്ത്‌ ചുരുങ്ങുന്നു.ഇതിനു ശേഷം അത്‌ പൂര്‍വ സ്ഥിതിയെ പ്രാപിക്കുന്നില്ല എന്നുള്ളതാണ്‌ ഇവിടെ തലയെ രക്ഷിക്കുന്ന ഒരു ഘടകം.കൂടാതെ തല തറയില്‍ ഇടിക്കുമ്പോള്‍ ഒരു സ്ഥലത്ത്‌ മാത്രമാണ്‌ മുഴുവന്‍ ഊര്‍ജവും കേന്ദ്രീകരിക്കുന്നത്‌.അതേ സമയം ഹെല്‍മെറ്റ്‌ ആകുമ്പോള്‍ ഈ ആഘാതം ആ പ്രതലത്തിന്റെ കൂടുതല്‍ സ്ഥലത്തേക്ക്‌ വ്യാപിക്കുന്നതിനാല്‍ ഏതെങ്കിലും ഒരു സ്ഥാനം മാത്രം മുഴുവന്‍ force താങ്ങേണ്ടിവരുന്ന ഒരു സാഹചര്യം ഇല്ലാതാക്കുന്നു.പിന്നെ , ലോറി കേറിയാല്‍ ഇതു പൊട്ടിപ്പ്പ്പൊകൂല്ലേ എന്നു ചോദിക്കുന്നവരോട്‌ എന്തു പറയാന്‍. അങ്ങനെയുള്ളവരുടെ തലയോട്ടിക്കുള്ളിലെ കാറ്റും ഇരുട്ടും തല പൊട്ടിക്കഴിയുമ്പോളെങ്കിലും മാറണമേ എന്നു പ്രാര്‍ഥിക്കാനേ നമുക്ക്‌ പറ്റൂ. തലച്ചേര്‍ (ചെളി)ആണ്‌ തലച്ചോറിനു പകരം എങ്കില്‍ പിന്നെ എപ്പോഴെങ്കിലും അതു പുറത്തു വന്നു തന്നെ തീരണം എന്ന് ചിലര്‍ക്ക്‌ നിര്‍ബന്ധമാണ്‌ !ഞാന്‍ 6 വര്‍ഷം (1984-1990) വണ്ടി (ബജജ്‌ സ്കൂട്ടര്‍ !!) ഓടിക്കുമ്പോഴൊക്കെ ഒരു full face ഹെല്‍മെറ്റ്‌ വയ്ക്കുമായിരുന്നു.അതു കാരണം ഇതു വരെ കഴുത്തു വേദനയോ, മുടി കൊഴിച്ചിലോ, മറ്റ്‌ അസുഖങ്ങളോ വന്നതായിട്ട്‌ ഓര്‍മയില്ല.പിന്നെ horn കേള്‍ക്കൂല്ല എന്ന "പരാതി"--horn കേട്ടാപ്പിന്നെ നമ്മളോക്കെ അങ്ങു മാറിക്കൊടുക്കുകയല്ലിയോ !




"ബോധവല്‍ക്കരണം".
തലയടിച്ചു വീണാല്‍ ചത്തുപോകും എന്നു എത്ര തവണ ബോധവല്‍ക്കരിക്കണം? രണ്ടാമത്തെ നിലയില്‍ നിന്ന് ചാടിയാല്‍ വല്ലതുമൊക്കെ പറ്റും അതുകൊണ്ട്‌ ചാടരുത്‌ എന്ന് നാം ബോധവല്‍ക്കരിക്കാറുണ്ടോ? 40 കിലോമീറ്റര്‍ സ്പീഡില്‍ പോകുമ്പോള്‍ വീണാല്‍ രണ്ടാം നിലയില്‍ നിന്ന് വീഴുന്ന അതേ impact ആണ്‌."ജനവികാരം" പേടിച്ചാണ്‌ പുറകിലത്തെ യാത്രക്കാരന്‌helmet വേണ്ട എന്ന ഭേദഗതി. അയാളുടെത്‌ തലയല്ലെ? അതൊ പൊട്ടാത്ത മരത്തല ഉള്ളവന്മാരാണ്‌ പുറകില്‍ ഇരിക്കുന്നത്‌ എന്നുണ്ടോ?
കഴിഞ്ഞ വര്‍ഷം ആകെ 3650 പേര്‍ കേരളത്തില്‍ മരിച്ചതില്‍ ഏതാണ്ട്‌ 1750 പേര്‍ ഇരുചക്ര യാത്രക്കാരായിരുന്നു. അതില്‍ നിന്ന് ഇതൊരു അപകടം പിടിച്ച സാധനം ആണെന്ന് നമുക്ക്‌ മനസ്സിലാക്കാവുന്നതെ ഉള്ളു.അപ്പോള്‍ എന്തെങ്കിലും വിധത്തില്‍ ചാവതെ വീട്ടിലെത്താനല്ലേ നോക്കേണ്ടത്‌? അതിന്‌ helmet സഹായിക്കുമെങ്കില്‍ (അതിനിനിയും സംശയമോ?) അതങ്ങ്‌ തലയില്‍ വച്ചൂടേ? ആരെങ്കിലും വഴിയില്‍ വടിയുമായി നിന്ന്"വയ്ക്ക്ക്കെടാ തലയില്‍" എന്നു പറഞ്ഞാലേ വയ്ക്കൂ എന്നു വന്നാല്‍?
ഒരു ദിവസം ഏതെങ്കിലും ഒരു ആശുപത്രിയില്‍ ബൈക്കില്‍ നിന്നു വീണ്‌ head injury വന്ന ഒരു രോഗിയെയും അദ്ദേഹത്തിനെ "രക്ഷിക്കാനായി" പച്ചവെള്ളം പോലെ (ഉണ്ടെങ്കിലും ഇല്ലെങ്കിലും) പൈസ ഒഴുക്കുന്ന കുടുംബത്തിനെയും കാണുമ്പോള്‍ നമുക്ക്‌ മനസ്സിലാകും ഹെല്‍മെറ്റിന്റെ ആവശ്യം.
ഈയിടെ ഒരു പത്രത്തില്‍ കണ്ട കത്ത്‌- "ഞാന്‍ 20 വര്‍ഷമായി ബൈക്ക്‌ ഓടിക്കുന്നു. ഇതു വരെ ഒന്നും പറ്റിയിട്ടില്ല .പിന്നെന്തിന്‌ ഞാന്‍ ഹെല്‍മെറ്റ്‌ വയ്ക്കണം" ?? ( അതെ താങ്കള്‍ ദൈവത്തിനു വേണ്ടപ്പെട്ടവനാണെന്ന് ഇതിനാല്‍ തെളിയിക്കപ്പെട്ടിരിക്കുന്നു.)

Monday, October 22, 2007

സ്പീഡ്‌ ലിമിറ്റ്‌ ആര്‍ക്കു വേണ്ടി ??- repost

എല്ലാ റോഡിലും വാഹനം ഓടിക്കുവാനായി ഒരു പരിമിതി ഏര്‍പ്പെടുത്തിയിട്ടുണ്ട്‌ അതാണ്‌ സ്‌പീഡ്‌ ലിമിറ്റ്‌. ഇതിന്റെ ആവശ്യമുണ്ടോ എന്നു നമുക്കു നോക്കാം.
സിറ്റിക്കകത്ത്‌ 40 കിലോമീറ്റര്‍ ഉം ഹൈ വെയ്‌ല്‌ 70 കിലോമീറ്റര്‍ ഉം വേഗത ആണ്‌ നിലവിലുള്ള സ്‌പീഡ്‌ ലിമിറ്റ്‌. പലര്‍ക്കും ഇതു വളരെ കുറഞ്ഞ വേഗത ആയിത്തോന്നറുണ്ട്‌ എങ്കിലും യഥാര്‍ഥത്തില്‍ എത്രയാണ്‌ എന്നറിയാമോ ? 40 ല്‍ പോകുമ്പോള്‍ ഓരോ സെക്കന്റിലും 11 മീറ്റര്‍ ആണു സഞ്ചരിക്കുന്നത്‌. ആലോചിച്ചു നോക്കിയാല്‍ ഇത്‌ വിചാരിക്കുന്നതുപോലെ അത്ര നിസ്സാരം അല്ല എന്നു മനസ്സിലാകും. അതുപോലെ 60 കിമി എന്നു പറഞ്ഞാല്‍ അത്‌ ഒരു സെക്കന്റില്‍ 16 മീറ്റര്‍ ആണ്‌.

എന്താണിതിന്റെ പ്രശ്നം എന്നല്ലേ ? സാധാരണ നിലയില്‍ ഒരാളിന്‌ വണ്ടി ചവിട്ടി നിര്‍ത്താന്‍ കുറഞ്ഞത്‌ ഒരു സെക്കന്റെങ്കിലും വേണം,കാരണം നമ്മുടെ മുമ്പില്‍ നടക്കുന്ന കാര്യങ്ങള്‍ കണ്ണുകള്‍ വഴി തലച്ചോറില്‍ എത്തിയതിനു ശേഷം അപകടം ഉണ്ടോ ഇല്ലയോ എന്നു വിലയിരുത്തി ഉണ്ടെങ്കില്‍ ബ്രേക്ക്‌ പിടിക്കൂ എന്നു കാലിലെയോ കൈയിലെയോ മാംസപേശികള്‍ക്ക്‌ തലച്ചോറിന്റെ നിര്‍ദ്ദേശം കിട്ടാനുള്ള സമയം ആണിത്‌.ദൈവം തമ്പുരാന്‍ വിചാരിചാല്‍ പോലും ഇതിന്റെ വേഗത കൂട്ടാന്‍ സാധിക്കുകയില്ല. ഇതു മാത്രം അല്ല പ്രശ്നം. വാഹനത്തിന്റെ ഭാരവും വേഗതയും അനുസരിച്ച്‌ അതിന്റെ ഊര്‍ജം (മൊമെന്റം) കൂടുന്നു.ബ്രേക്ക്‌ ചവിട്ടിക്കഴിഞ്ഞ്‌ ഒന്നോ രണ്ടോ സെക്കന്റെടുക്കും വണ്ടി നില്‍ക്കാന്‍. സൈക്കിള്‍ നിര്‍ത്താന്‍ വേണ്ടതിനേക്കാള്‍ കൂടുതല്‍ ദൂരം വേണം സ്കൂട്ടര്‍ നിര്‍ത്താന്‍ എന്നുള്ളത്‌ നമുക്കെല്ലാം അറിയാം. അതിനേക്കാള്‍ പതിന്മടങ്ങ്‌ വേഗത്തില്‍ വരുന്ന കാറോ ബസ്സോ ലോറിയോ പിടിച്ചാലുടന്‍ നില്‍ക്കാത്തതില്‍ ഒട്ടും അത്ഭുതപ്പെടണ്ടതില്ല.

പക്ഷേ ഇതു നമ്മളില്‍ പലര്‍ക്കും മനസ്സിലാകാന്‍ താമസ്സിക്കുന്നു. ഫലമോ നിത്യേന ഉണ്ടാകുന്ന അപകട മരണങ്ങളുടെ നീണ്ട ലിസ്റ്റ്‌ ! നമ്മളുടെ സ്‌പീഡ്‌ അനുസരിച്ച്‌,വണ്ടി നില്‍ക്കാന്‍ വേണ്ട ദൂരവും, സമയവും കൂടുന്നു.

40ല്‍ പോകുമ്പോള്‍ (11 മീറ്റര്‍ / സെക്കന്റ്‌)നമ്മുടെ മുമ്പില്‍ ഒരു കുട്ടി എടുത്തു ചാടി എന്നിരിക്കട്ടെ. നമ്മള്‍ വളരെ "ശ്രദ്ധയോടെ" ഓടിക്കുന്നതുകൊണ്ട്‌ (ഹ ഹ ഹ )ഇത്‌ നാം ഉടനെ കാണുകയും ബ്രേക്ക്‌ ചവിട്ടാന്‍ തുടങ്ങുകയും ചെയ്യുന്നു ( ഒരു സെക്കന്റ്‌). വണ്ടിയുടെ ഊര്‍ജം കാരണം അത്‌ നില്‍ക്കുന്നതിനായി ഒരു സെക്കന്റ്‌ എങ്കിലും എടുക്കും എന്നു വയ്ക്കുക. അതായത്‌ ഏതാണ്ട്‌ രണ്ട്‌ സെക്കന്റ്‌ കഴിഞ്ഞേ വണ്ടി നില്‍ക്കാന്‍ പോകുന്നുള്ളൂ. അപ്പോഴേക്കും 22 മീറ്റര്‍ നാം സഞ്ചരിച്ചു കഴിഞ്ഞിരിക്കുന്നു. കുട്ടി എടുത്തു ചാടിയത്‌ 22 മീറ്ററിന്‌ അകത്താണെങ്കില്‍ (21 മീറ്റര്‍ ആണെങ്കില്‍ പോലും)നാം ഈ കുട്ടിയെ കൊന്നു കഴിഞ്ഞിരിക്കും കാരണം നാം പോയി ഇടിക്കുന്നതിന്റെ ആഘാതം വണ്ടിയുടെ ഭാരത്തിനെ ഒരു സെക്കന്റിലെ സ്പീഡ്‌ കൊണ്ട്‌ ഗുണിക്കുമ്പോള്‍ കിട്ടുന്നത്രയും വലുതാണ്‌ ( കാറിന്റെ ഭാരം 1000 കിലോ ആണെങ്കില്‍, 11 മീറ്റര്‍ ഗുണം 1000 =11000 ന്യുട്ടണ്‍ ആണ്‌ ആ കുട്ടിയുടെ മേല്‍ വരുന്ന ആഘാതം).പിന്നെങ്ങനെ ജീവിച്ചിരിക്കും?

സ്പീഡ്‌ കൂടുന്നത്‌ അനുസരിച്ച്‌ നമുക്ക്‌ ആലോചിക്കാനുള്ള സമയം കുറയുന്നതോടൊപ്പം വണ്ടി നില്‍ക്കാന്‍ വേണ്ട സമയം കൂടുകയും ചെയ്യുന്നതിനാല്‍, അപകട സാധ്യത വളരെയധികം വര്‍ധിക്കുന്നു.

ഓര്‍മ്മിക്കുക -- 40 കിലോമീറ്ററില്‍ താഴെ നടക്കുന്ന അപകടങ്ങളില്‍ 80 ശതമാനം പേരും ജീവനോടെ രക്ഷപ്പെടുമ്പോള്‍ 40നു മുകളില്‍ നടക്കുന്ന അപകടങ്ങളില്‍ 80 ശതമാനം പേരും മരിക്കുന്നു.

അതുപോലെ മുന്‍പില്‍ പോകുന്ന വാഹനത്തിനെ തൊട്ടു തൊട്ടില്ല എന്ന മട്ടില്‍ പോകുന്ന ചിലരുണ്ട്‌- നിര്‍ത്താന്‍ 2 സെക്കന്റ്‌ എങ്കിലും എടുക്കും എന്നുള്ളതു കൊണ്ടാണ്‌ വികസ്വര രാജ്യങ്ങളില്‍ 2 സെക്കന്റ്‌ ഗ്യാപ്‌ എന്ന ആശയം കൊണ്ടുവന്നിരിക്കുന്നത്‌. അതായത്‌ നമ്മള്‍ 2 സെക്കന്റില്‍ സഞ്ചരിക്കാന്‍ സാധ്യത ഉള്ള ദൂരം (40ല്‍ ആണെങ്കില്‍ 11 മീറ്റര്‍, 60 ല്‍ ആണെങ്കില്‍ 16 മീറ്റര്‍ എന്നിങ്ങനെ ) നമ്മുടെ മുന്നിലുള്ള വാഹനവും ആയി അകലം വേണം. നമ്മളില്‍ എത്ര പേരുണ്ട്‌ ഇങ്ങനെ അകലം ഇട്ടു പോകന്‍ ശ്രമിക്കുന്നത്‌ ? ആരെങ്കിലും അങ്ങനെ അകലം ഇട്ടാല്‍ തന്നെ സെക്കന്റുകള്‍ക്കകം അതിനിടയില്‍ കേറുന്ന "മിടുക്കന്മാരും" നമ്മുടെ ഇടയില്‍ ഉണ്ട്‌.

ഏല്ലാവര്‍ക്കും ഒരേ സ്പീഡ്‌ ലിമിറ്റ്‌ തന്നെ- വലിയ വണ്ടിക്ക്‌ വലിയ സ്പീഡ്‌ എന്നു വിചാരിച്ച്‌ ചീറിപ്പാഞ്ഞു നടക്കുന്നവരെയും,ഗവണ്‍മന്റ്‌ വണ്ടിയുടെ സ്റ്റിയെറിംഗ്‌ പിടിച്ചു കഴിഞ്ഞാല്‍ പിന്നെ "രാജാവാണു ഞാന്‍" എന്ന മട്ടില്‍ ഓടിക്കുന്ന ധാരാളം പേരെയും നമുക്ക്‌ ദിവസവും കാണാവുന്നതാണ്‌ ഈതിലേറ്റവും രസം എന്നു പറയുന്നത്‌ -പ്രത്യേകിച്ച്‌ ഒന്നും ചെയ്യാനില്ലാത്തവനാണ്‌ " ഞാന്‍ ഒരു വകയ്ക്ക്‌ കൊള്ളാത്തവന്‍ ആണല്ലോ" എന്നുള്ള അപകര്‍ഷതാബോധം മറക്കാന്‍ വേണ്ടി പലപ്പോഴും ചീറിപ്പാഞ്ഞ്‌ പോകുന്നത്‌ എന്നതാണ്‌. അവന്‍ കാരണം അപകടത്തില്‍ പെടുന്നതോ വെറും നിരപരാധികളും !

Tuesday, October 16, 2007

ഇത്രയധികം വിവരദോഷികള്‍ നമ്മുടെ "സാക്ഷര "കേരളത്തിലോ?







ചോദിക്കാതെ വയ്യ.









ഹെല്‍മെറ്റ്‌ വയ്ക്കാതിരിക്കാന്‍ ഓരോ കാരണം കണ്ടുപിടിക്കുന്നവര്


‍ഹെല്‍മെറ്റ്‌ തലയിലാണ്‌ വയ്ക്കേണ്ടത്‌ എന്നുപോലും അറിഞ്ഞുകൂടാത്തവര്‍.












ഒരു തവണ വീണ്‌ തലപൊട്ടിയാലും മനസ്സിലാക്കാത്തവര്‍.



സീറ്റ്ബെല്‍റ്റ്‌ ഇടുന്നത്‌ നാണക്കേടായിക്കാണുന്നവര്‍.












പുറകിലിരുന്നാല്‍ സീറ്റ്ബെല്‍റ്റ്‌ ഇടണ്ട എന്നുള്ള മണ്ടന്‍ നിയമം കാരണം പുറകില്‍ ബെല്‍റ്റ്‌ ഇടാത്തവര്‍.










ഇടത്തു വശത്തുകൂടി ഓവര്‍ടേക്ക്‌ ചെയ്യുന്നവര്‍.

സ്പീഡ്‌ ലിമിറ്റ്‌ എന്നാല്‍ എന്താണ്‌ എന്നറിഞ്ഞുകൂടാത്തവര്‍.


സ്പീഡ്‌ ലിമിറ്റ്‌ എന്താണെന്ന് അറിയാമെങ്കിലും അനുസരിക്കേണ്ട കാര്യമില്ല എന്നു വിശ്വസിക്കുന്നവര്‍.
വണ്ടികളുടെ ഇടയില്‍ക്കൂടി ഞെരുങ്ങി മുന്നില്‍ക്കയറുന്നത്‌ ഒരു കഴിവാണെന്ന് വിചാരിച്ചുവെച്ചിരിക്കുന്നവര്‍.

ലൈസെന്‍സ്‌ എടുക്കാന്‍ പ്രായമാകാത്ത കുഞ്ഞുങ്ങള്‍ക്ക്‌ വണ്ടി ഓടിക്കാന്‍ കൊടുക്കുന്ന മാതാപിതാക്കള്‍.


ഇവരെ മുഴുവന്‍ നന്നാക്കിയെടുക്കാന്‍ വര്‍ഷങ്ങള്‍ എടുക്കും .പക്ഷേ നമ്മള്‍ എന്തുകൊണ്ട്‌ ഇതു വരെ തുടങ്ങിയില്ല?

കഴിഞ്ഞ വര്‍ഷം "സാക്ഷര"കേരളത്തില്‍ 3650 പേര്‍ മരിച്ചു.
അതില്‍ 40% ഇരു ചക്രവാഹനങ്ങള്‍ ഓടിക്കുന്നവരായിരുന്നു.
32% കാല്‍നടയാത്രക്കാരും.

ഇത്രയും പേര്‍ ചാവേണ്ട ആവശ്യമുണ്ടോ?



October 17 - World Trauma Day - spend it wisely. Tell someone about safe driving.
(all copyrights gratefully acknowledged)

Friday, August 10, 2007

ഹെല്‍മെറ്റിന്റെ സത്യാവസ്ഥ


തിരുവനന്തപുരം മെഡിക്കല്‍ കോളേജിലെ എന്റെ ഒരു സുഹൃത്ത്‌ കണ്ടുപിടിച്ചു തന്ന കണക്കുകള്‍.


സാധാരണ Neurosurgery Intensive care unit ല്‍ ഏതാണ്ട്‌ 15 serious head injury patientsനെ ഓരോ ആഴ്ചയും അഡ്മിറ്റ്‌ ചെയ്യും.


ഹെല്‍മെറ്റ്‌ compulsory ആക്കിയതിന്റെ മുന്‍പുള്ള ആഴ്ചയും 16 പേര്‍ ICU വില്‍ അഡ്മിറ്റ്‌ ചെയ്യേണ്ടി വന്നു.


compulsory ആക്കിയ ആഴ്ച വെറും 5 പേര്‍അതിന്റെ അടുത്ത ആഴ്ചയും 5 പേര്‍ മാത്രം.


ഇപ്പ്പ്പോള്‍ വീണ്ടും 16 പേര്‍ ഓരോ ആഴ്ചയും ഉണ്ട്‌.


തിരുവനന്തപുരത്ത്‌ neurosurgey facility ഉള്ള പല ആശുപത്രികളിലും ഇങ്ങനെ തന്നെ ആയിരുന്നിരിക്കണം.



അതായത്‌ helmet compulsory ആക്കിയപ്പ്പ്പോള്‍ serious head injury മൂന്നിലൊന്നായി കുറഞ്ഞത്രേ.


ഛായ്‌ ! ലജ്ജാവഹം !


സാരമില്ല ഇപ്പോള്‍ വീണ്ടും പഴയ നിലയില്‍ എത്തിയിട്ടുണ്ട്‌.


ഹെല്‍മെറ്റ്‌ ആവശ്യമില്ല എന്നു വിശ്വസിക്കുന്ന ഒരു കൂട്ടം ജനം കേരളത്തിലുണ്ട്‌. അവരുടെ സംഖ്യ ദിവസേന കുറഞ്ഞു വരുന്നുണ്ട്‌ എന്നുള്ളത്‌ സ്വാഗതാര്‍ഹമാണ്‌


പക്ഷേ തലപൊട്ടിച്ചത്തിട്ടു വേണോ ഈ സംഖ്യ കുറയാന്‍???

Saturday, July 14, 2007

ഹെല്‍മെറ്റ്‌ വച്ചാല്‍


തലമുടി കൊഴിയും

സൈനുസൈറ്റിസ്‌ വരും

തലനീരിറങ്ങും

സന്ധിവാതം വരും

spondylitis വരും

കേള്‍വി കുറയും

കാഴ്ച നശിക്കും

പ്രോസ്റ്റേറ്റ്‌ ഗ്രന്ഥി വീങ്ങും (ആണുങ്ങള്‍ക്ക്‌)

ക്യാന്‍സര്‍ വരും

ചൊറി വരും
ഇങ്ങനെ എന്തല്ലാം പ്രശ്നങ്ങള്‍ !

വച്ചില്ലെങ്കിലോ? ഒന്നുമില്ല.താഴെവീണ്‌ തല പൊട്ടി ചാവും എന്നു മാത്രമേ ഉള്ളു.

ഏതാണ്ട്‌ 10 കുഴപ്പങ്ങളും ഒരൊറ്റ ഗുണവും. അപ്പോപ്പിന്നെ ഹെല്‍മെറ്റ്‌ വയ്ക്കുന്നതെന്തിനാ?

Wednesday, July 11, 2007

ചാവുന്നതിനു തൊട്ടു മുന്‍പ്‌ !


സ്വന്തം തലയ്ക്കു വേണ്ടിയല്ല പലരും ഹെല്‍മെറ്റ്‌ വാങ്ങുന്നത്‌. വഴിയില്‍ നില്‍ക്കുന്ന പോലീസിനെക്കാണിക്കാന്‍ വേണ്ടിയാണ്‌. കാരണം---

പത്തോ ഇരുനൂറോ രൂഫായ്ക്ക്‌ ചട്ടിയുടെ ഷേപ്പില്‍ ഉള്ള ഒരു സാധനം റോഡ്‌ അരികത്തുനിന്നാണ്‌ പലരും വാങ്ങുന്നത്‌. അംഗീകൃത കമ്പനികളുടെ ISI മാര്‍ക്കുള്ളതേ വാങ്ങിക്കാവൂ എന്ന് എത്ര പറഞ്ഞാലും മനസ്സിലാവില്ല-
ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.

ഹെല്‍മെറ്റ്‌ handle barല്‍ തൂക്കിയാല്‍ പോര എന്ന് എത്ര പറഞ്ഞാലും മനസ്സിലാവില്ല. ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.

ഹെല്‍മെറ്റ്‌ പുറകിലിരിക്കുന്നവന്റെ കായില്‍ ഇരുന്നാല്‍ പോരാ എന്ന് എത്ര പറഞ്ഞാലും മനസ്സിലാവില്ല. ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.

ഹെല്‍മെറ്റ്‌ പുറകിലത്തെ സ്റ്റാന്റില്‍ ഭദ്രമായി കെട്ടിവച്ചാല്‍ പോര തലയില്‍ വയ്ക്കണം എന്ന് എത്ര പറഞ്ഞാലും മനസ്സിലാവില്ല. ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.

ഹെല്‍മെറ്റ്‌ തലയില്‍ വച്ചാല്‍ മാത്രം പോരാ അതിന്റെ strap നേരേ ഇട്ടില്ലെങ്കില്‍ അത്‌ തെറിച്ചു പോവും എന്ന് അത്ര പറഞ്ഞാലും മനസ്സിലാവില്ല. ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.

സ്വന്തം തല മരം കൊണ്ടുണ്ടാക്കിയതല്ലെന്നും താഴെ വീണാല്‍ അത്‌ പൊട്ടുമെന്നും എത്ര പരഞ്ഞാലും മനസ്സിലാവില്ല. ""ഞാന്‍ മലയാളി ആണ്‌ എന്റെ തല മരം കൊണ്ടാണ്‌ ഞാന്‍ ഒരു മരത്തലയനാണ്‌ ""എന്നിങ്ങനെ കടുമ്പിടിത്തം പിടിച്ചാലോ?

ചാവുന്നതിന്‌ തൊട്ടു മുന്‍പേ മാത്രമായിരിക്കും ഇതോര്‍ക്കുക.